अखंड हरिनाम सप्ताहात कर्तव्यदक्ष ठाणेदार धनराज निळे यांचा गौरव; भक्तीमय वातावरणात सत्कार सोहळा
लोकवेध न्यूज नेटवर्क / २६ मार्च
महागाव :-
महागाव येथील श्री हनुमान मंदिरात सुरू असलेल्या अखंड हरिनाम सप्ताहाच्या पवित्र निमित्ताने कर्तव्यदक्ष ठाणेदार धनराज निळे यांचा भावपूर्ण सत्कार करण्यात आला. धार्मिक आणि भक्तीमय वातावरणात पार पडलेल्या या सोहळ्याने उपस्थितांमध्ये विशेष उत्साह निर्माण झाला.
यावेळी मंदिर परिसरात हरिनामाच्या गजरात आणि टाळ-मृदुंगाच्या निनादात वातावरण भक्तीमय झाले होते. कार्यक्रमादरम्यान मान्यवरांच्या हस्ते शाल, श्रीफळ व पुष्पगुच्छ देऊन ठाणेदार धनराज निळे यांचा सत्कार करण्यात आला.
धनराज निळे यांनी आपल्या कर्तव्यदक्ष आणि जनतेप्रती असलेल्या संवेदनशील कार्यशैलीमुळे महागाव परिसरात वेगळी ओळख निर्माण केली आहे.त्यांच्या कार्याचा गौरव म्हणून हा सत्कार करण्यात आल्याचे आयोजकांनी सांगितले.
या प्रसंगी गावातील मान्यवर, नागरिक, तसेच भक्तगण मोठ्या संख्येने उपस्थित होते.कार्यक्रमामुळे धार्मिक उत्साहाबरोबरच सामाजिक एकात्मतेचा संदेशही देण्यात आला.