लोकवेध न्यूज नेटवर्क / ०९ ऑक्टोंबर.

महागाव, जि. यवतमाळ

शेतकऱ्यांच्या कष्टाला योग्य मोबदला मिळावा, त्यांच्या घामाला सन्मान मिळावा आणि शेतीच्या माध्यमातून त्यांच्या कुटुंबाच्या आर्थिक प्रगतीचा मार्ग खुला व्हावा, ही अपेक्षा प्रत्येक ऊस उत्पादक शेतकऱ्याची असते.मात्र, वाढता उत्पादन खर्च, सिंचनाचा प्रश्न, खतांच्या आणि औषधांच्या किमती, मजुरीचा वाढता भार आणि निसर्गाची अनिश्चितता यामुळे शेतकऱ्यांची आर्थिक गणिते दिवसेंदिवस कठीण होत आहेत. अशा परिस्थितीत ऊस उत्पादक शेतकऱ्यांच्या पाठीशी उभे राहणारा साखर कारखाना हा केवळ ऊस गाळप करणारा उद्योग राहत नाही, तर परिसराच्या ग्रामीण अर्थव्यवस्थेला आधार देणारा महत्त्वाचा घटक ठरतो.याच पार्श्वभूमीवर महागाव तालुक्यातील गुंज (सवना) येथील नॅचरल शुगर अँड अलाइड इंडस्ट्रीज लिमिटेडच्या युनिट क्रमांक २ ने यंदाच्या गाळप हंगामासाठी पहिला हप्ता प्रतिटन ३२०० रुपये जाहीर केला आहे.

कारखान्याचे संस्थापक अध्यक्ष बी. बी. डोंबरे यांनी हा निर्णय जाहीर केला असून,अंतिम ऊसदर विदर्भात सर्वाधिक ठेवण्याचा मानसही व्यक्त केला आहे.

शेतकऱ्यांच्या घामाला न्याय देण्याची भूमिका

ऊस उत्पादन करणे म्हणजे केवळ शेतात पीक घेणे नव्हे. जमिनीची मशागत, बेणे, लागवड, खते, औषधे, पाणी, मजूर आणि पिकाची वर्षभर काळजी यासाठी शेतकरी मोठी आर्थिक गुंतवणूक करतो. अनेकदा पीक हातात येईपर्यंत त्याला कर्जाचा आधार घ्यावा लागतो. अशा वेळी ऊस गाळपानंतर मिळणारा दर आणि वेळेवर होणारे पैसे हे शेतकऱ्याच्या संसाराचा आर्थिक कणा असतात.

नॅचरल शुगरने पहिला हप्ता प्रतिटन ३२०० रुपये जाहीर केल्याने ऊस उत्पादकांना सुरुवातीचा आर्थिक आधार मिळण्याची अपेक्षा निर्माण झाली आहे. 

विशेषतः यंदाच्या प्रतिकूल परिस्थितीत ऊस उत्पादकांना दिलासा देणारा निर्णय म्हणून या घोषणेकडे पाहिले जात आहे.मात्र, शेतकऱ्यांच्या दृष्टीने केवळ पहिला हप्ता नव्हे, तर संपूर्ण हंगामातील अंतिम दर, देयकांची वेळ आणि प्रत्यक्ष उत्पादन खर्चाच्या तुलनेत मिळणारा मोबदला हे मुद्देही तितकेच महत्त्वाचे आहेत.

————————–

⬛कारखाना म्हणजे केवळ गाळप नव्हे,तर ग्रामीण अर्थव्यवस्थेचा आधार

साखर कारखान्याचे महत्त्व केवळ उसाचे गाळप करून साखर तयार करण्यापुरते मर्यादित नसते. कारखाना सुरू राहिल्यामुळे ऊस उत्पादक शेतकऱ्यांना बाजारपेठ उपलब्ध होते. ऊस वाहतूक, तोडणी, मजूर, ट्रॅक्टरचालक, वाहनधारक, लहान व्यावसायिक आणि परिसरातील अन्य घटकांनाही रोजगाराच्या संधी मिळतात. कारखान्याच्या माध्यमातून निर्माण होणारी आर्थिक उलाढाल गावागावांतील बाजारपेठेला चालना देऊ शकते.महागाव आणि परिसरातील ऊस उत्पादकांसाठी नॅचरल शुगरचा गाळप हंगाम त्यामुळे महत्त्वाचा ठरतो. कारखान्याची यशस्वी वाटचाल आणि शेतकऱ्यांचा आर्थिक विकास हे परस्परांशी जोडलेले आहेत. 

-सन २०१६ पासून ऊस उत्पादकांना चांगला दर देण्याचा प्रयत्न सुरू असल्याचे त्यांनी नमूद केले. शेतकऱ्यांना योग्य मोबदला मिळावा आणि ऊस लागवडीला प्रोत्साहन मिळावे, यासाठी कारखान्याच्या माध्यमातून प्रयत्न सुरू असल्याचे ठोंबरे यांनी बोलताना सांगितले.

शेतकऱ्यांप्रती निष्ठा आणि आपुलकी ही केवळ भाषणातून नव्हे, तर प्रत्यक्ष निर्णयांतून दिसून येते. योग्य ऊसदर, वेळेवर देयके, पारदर्शक वजनमाप,तोडणी-वाहतुकीचे नियोजन आणि संकटाच्या काळात शेतकऱ्यांना सहकार्य या गोष्टींमधून कारखाना व्यवस्थापनाची बांधिलकी असल्याचे ते पुढे बोलताना म्हणाले.

———————————–

अंतिम ऊसदराकडे शेतकऱ्यांचे लक्ष

नॅचरल शुगरच्या ११ व्या गाळप हंगामाचा शुभारंभ मंगळवार, ६ ऑक्टोबर २०२६ रोजी कारखाना परिसरात संपन्न झाला. यावेळी ऊस उत्पादक शेतकरी गिरीश अग्रवाल यांच्या हस्ते गाळप हंगामाचा शुभारंभ करण्यात आला. या कार्यक्रमात कारखान्याच्या व्यवस्थापनाचे आणि शेतकऱ्यांसाठी करण्यात येणाऱ्या प्रयत्नांचे कौतुक करण्यात आले.

पहिला हप्ता प्रतिटन ३२०० रुपये जाहीर करण्यात आला असला, तरी अंतिम ऊसदर किती निश्चित होतो आणि उर्वरित रक्कम शेतकऱ्यांना कधी मिळते, याकडे आता ऊस

उत्पादकांचे लक्ष लागले आहे.