वाकोडी येथे अंत्यसंस्कारासाठी जाणाऱ्या क्रुझरचा वेणी फाट्यावर भीषण अपघात; पाच जण जखमी, एकाची प्रकृती गंभीर
⚫ लोकवेध न्यूज नेटवर्क
महागाव :-
तालुक्यातील वाकोडी येथे अंत्यसंस्कारासाठी जात असलेल्या क्रुझर वाहनाचा पुसद माहूर मार्गावरील वेणी फाट्यावर अपघात होऊन पाच जण जखमी झाले असून त्यातील एकाची प्रकृती गंभीर आहे. ही घटना आज दुपारी सुमारे एक वाजताच्या सुमारास घडली.
सविस्तर वृत्त असे की तालुका वाशिम ,शिरपूर जैन येथील पुरुष आणि काही महिला भगिनी महागाव तालुक्यातील वाकोडी येथे अंत्यसंस्कारासाठी जात असताना पुसद माहूर मार्गावरील वेणी फाट्यावर क्रुझर गाडी क्रमांक एम एच ३७ जी ७३६९ हे भरधाव वेगातील वाहन वळणावर असलेल्या कॅनल मध्ये पलटी झाले. नशीब बलवत्तर म्हणून या घटनेत घटनास्थळी कुठलीही जीवितहानी झाली नसून यामध्ये चालकासह पाच प्रवासी जखमी झाले असून एकाची प्रकृती गंभीर असल्याचे कळते.
अपघातानंतर गुंज येथील नागरिकांनी तात्काळ मदतीला धाव घेत जखमींना वाहनाबाहेर काढले व खाजगी वाहनांच्या माध्यमातून त्यांना पुसद येथे उपचारासाठी रवाना केले. प्रत्यक्षदर्शींनी दिलेल्या माहितीनुसार सदर क्रुझरमध्ये एकूण बारा प्रवासी होते.दरम्यान, घटनास्थळी उपस्थित नागरिकांनी आरोग्य विभागाच्या १०८ रुग्णवाहिका सेवेला संपर्क साधला असता, वाहन येण्यास विलंब झाला. त्यामुळे अपघाताच्या गंभीर प्रसंगी आरोग्य यंत्रणेची निष्क्रियता स्पष्टपणे दिसून आल्याची प्रतिक्रिया नागरिकांतून व्यक्त करण्यात आली.घटनेची माहिती मिळताच महागाव पोलीस घटनास्थळी तात्काळ दाखल झाले असून परिस्थिती नियंत्रणात आणत पुढील तपास सुरू आहे.