महागाव नगरपंचायतीत सत्तासंघर्ष टोकाला अविश्वास ठरावासाठी ११ नगरसेवक यवतमाळच्या दिशेने; राजकीय वातावरण तापले
⚫लोकवेध न्यूज नेटवर्क /०९ फेब्रुवारी
महागाव :
महागाव नगरपंचायत सभागृहातील राजकारण सध्या चांगलेच तापले असून विद्यमान नगराध्यक्ष सौ. सुनंदाताई दिलीपराव कोपरकर यांच्या विरोधात अविश्वास ठराव आणण्याच्या हालचालींना वेग आला आहे. नगरपंचायतीतील तब्बल ११ नगरसेवक यवतमाळ जिल्हाधिकारी कार्यालयाच्या दिशेने रवाना झाल्याची माहिती विश्वसनीय सूत्रांनी दिली आहे.
अविश्वास ठरावासंदर्भात प्रशासकीय प्रक्रिया पूर्ण करण्यासाठी नगरसेवकांनी जिल्हा स्तरावर धाव घेतल्याने महागावच्या राजकीय व शासकीय वर्तुळात एकच खळबळ उडाली आहे. गेल्या काही दिवसांपासून नगरपंचायत कारभारावरून सुरू असलेली नाराजी आता उघड संघर्षाच्या टप्प्यावर पोहोचली असल्याचे चित्र आहे.
दरम्यान, नुकत्याच घडलेल्या चार पासून उपनगराध्यक्षांच्या ड्रामेबाज ’अपहरणाचा एक अध्याय संपला असला तरी त्या संदर्भातील पोलीसी कारवाई अद्याप सुरूच असल्याने राजकीय वातावरण अधिकच अस्थिर झाले आहे.या घडामोडींच्या पार्श्वभूमीवर अविश्वास ठरावाची वेळ आणि हालचाली यामुळे विविध तर्कवितर्कांना उधाण आले आहे.महागाव नगरपंचायतीत सध्या सत्ताधारी आणि विरोधकांमध्ये स्पष्ट रेषा आखल्या गेल्या असून पुढील काही दिवसांत नगरपंचायतीच्या राजकारणाला नेमके कोणते वळण मिळणार, याकडे संपूर्ण तालुक्याचे लक्ष लागले आहे.
महागावच्या राजकीय नौटंकीचा पुढील अंक काय असेल, हे येणारा काळच ठरवेल,मात्र सध्या तरी नगरपंचायत राजकारण ऐन उफाळ्यावर असल्याचे स्पष्ट आहे.