एकवीस हजारांची मदत नव्हे, तर धडधडणाऱ्या भविष्याची हमी ! विलास पवार यांच्या माणुसकीने यशच्या आयुष्याला आशेचा नवा श्वास

⚫ लोकवेध न्यूज नेटवर्क /० ८ फेब्रुवारी 

महागाव :

आजच्या स्वार्थी युगातही माणुसकी जिवंत आहे, याचा प्रत्यय पुन्हा एकदा आला. जिव्हाळ्याची भिंत चॅरिटेबल ट्रस्टच्या माध्यमातून हृदय प्रत्यारोपणासाठी संघर्ष करणाऱ्या यश रवींद्र शेंडे या चिमुकल्यासाठी २१ हजार रुपयांची मदत देताना विलास श्रीराम पवार यांचे मन भरून आले.ही मदत केवळ आर्थिक नव्हे, तर एका निरागस जीवाच्या धडधडणाऱ्या भविष्यासाठी दिलेला आधार आहे.आपल्या घरातील पोरगं वाचावं,त्याच्या आयुष्यात पुन्हा हसू यावं,अशी भावनिक प्रार्थना त्यांनी देवाच्या चरणी अर्पण केली.

महागाव शहराचे भूमिपुत्र आणि सध्या पांढरकवडा येथे सामाजिक कार्यात सक्रिय असलेले विलास पवार हे प्रहार जनशक्ती पक्षाचे जिल्हा नेते तसेच वडार समाज संघटनेचे महाराष्ट्र प्रदेश अध्यक्ष आहेत.सामाजिक बांधिलकी जपत त्यांनी याआधीही महागाव तालुक्यातील उटी येथील एका गरजू विद्यार्थ्याच्या शिक्षणाची संपूर्ण जबाबदारी उचलून त्याच्या आयुष्याला दिशा दिली होती.

गरिबी,आजारपण किंवा शिक्षणाची अडचण कुठेही माणूस अडखळताना दिसला,की मदतीसाठी धावून जाणे,हीच त्यांची ओळख बनली आहे.समाजासाठी झटणाऱ्या या उदात्त अंतःकरणाच्या व्यक्तिमत्त्वामुळे अनेक कुटुंबांच्या आयुष्यात आशेचा उजेड पसरला आहे.आज यशसाठी दिलेली ही मदत अनेकांसाठी प्रेरणादायी ठरत असून,माणुसकी अजून जिवंत असल्याचा हा जिवंत पुरावा म्हटल्यास वावगे ठरू नये.