मध्यरात्री अंधारात पोलिसांचा उजेड माळरानात अडकलेल्या प्रवाशांसाठी महागाव–बिटरगाव पोलीस ठरले देवदूत
⚫ लोकवेध न्यूज नेटवर्क
महागाव :-
महागाव–बिटरगाव पोलिसांच्या समन्वयातून माणुसकीचे जिवंत उदाहरण समोर आले असून, मध्यरात्री निर्जन माळरानात अडकलेल्या प्रवाशांसाठी पोलीस खऱ्या अर्थाने देवदूत ठरले आहेत.अडचणीच्या क्षणी दाखवलेल्या तत्परतेमुळे संभाव्य मोठा अनर्थ टळला असून,प्रवाशांनी पोलिसांच्या या मदतीबद्दल कृतज्ञता व्यक्त केली आहे.रात्रीचा घनघोर अंधार,आजूबाजूला सामसूम माळरान आणि अचानक स्कूल बसचे एकामागोमाग दोन्ही टायर पंक्चर झाले.बसमध्ये महिला व लहान मुले असल्याने क्षणातच भीतीचे वातावरण निर्माण झाले. रस्ता ओसाड,मदतीचा कोणताही मार्ग नसल्याने प्रवासी अक्षरशः अडकून पडले होते.
मिळालेल्या माहितीनुसार, दिनांक ४ फेब्रुवारी रोजी रात्री एक वाजताच्या सुमारास एका खाजगी कार्यक्रमानिमित्त पुसद येथे गेलेली स्कूल बस रात्री सुमारे १ वाजताच्या सुमारास गांजेगावकडे परतत असताना महागाव पोलीस ठाण्याच्या हद्दीतील निर्जन माळरानात अचानक थांबली. बसचे दोन्ही टायर पंक्चर झाल्याने वाहन हलवणे अशक्य झाले.महिलांच्या अंगावर दागिने होते, तर लहान मुले अंधारामुळे प्रचंड घाबरली होती.
या घटनेची माहिती काही जागरूक नागरिकांनी तात्काळ बिटरगाव पोलीस ठाण्याचे ठाणेदार पांडुरंग शिंदे यांना दिली. परिस्थितीचे गांभीर्य ओळखून ठाणेदार शिंदे यांनी क्षणाचाही विलंब न लावता महागाव पोलीस ठाण्याचे ठाणेदार धनराज निळे यांच्याशी संपर्क साधून संपूर्ण माहिती दिली. दरम्यान ठाणेदार धनराज निळे यांनी त्वरित आपल्या पथकासह घटनास्थळी धाव घेतली. पोलीस नाईक सुनील माथणे व चालक विवेक पारडकर यांच्या मदतीने पोलिसांनी परिस्थिती हाताळली.मध्यरात्री पंक्चरचे दुकान मिळणे अवघड असतानाही पोलिसांनी स्वतः जाऊन दुकानदाराला उठवले, दुकान उघडून घेतले आणि बसचे दोन्ही टायर पंक्चर काढून घेतले.
जोपर्यंत बस पूर्णपणे दुरुस्त होऊन सुरक्षितपणे मार्गस्थ झाली नाही, तोपर्यंत पोलीस पथक घटनास्थळीच तैनात होते.आम्ही फार घाबरलो होतो,पण पोलिसांनी ज्या पद्धतीने धावून येत मदत केली,ते आमच्यासाठी देवदूतासारखे होते, अशी भावना प्रवाशांनी व्यक्त केली.
महागावचे ठाणेदार धनराज निळे,बिटरगावचे ठाणेदार पांडुरंग शिंदे आणि त्यांच्या सहकाऱ्यांनी दाखवलेली ही माणुसकी संपूर्ण परिसरात कौतुकाचा विषय ठरत आहे.