ढाणकी नगरपंचायतमध्ये सत्ता सर्वांची, मग विरोधात कोण ? शिवसेना (उद्धव–शिंदे), भाजप, काँग्रेस, एमआयएम सत्तेत;नागरिकांचा थेट सवाल निवडणूक संपली, आता जबाबदारी स्वीकारा,सोशल मीडियावर नागरिकांच्या संतप्त प्रतिक्रिया
⚫ लोकवेध न्यूज नेटवर्क
ढाणकी :-
ढाणकी नगरपंचायतमध्ये सध्या विरोधी पक्षच शिल्लक नसल्याचे राजकीय चित्र स्पष्ट होत असताना, तरीही शहरातील मूलभूत प्रश्न मार्गी न लागल्याने नागरिकांमध्ये तीव्र नाराजी व्यक्त होत आहे. शिवसेना (उद्धव ठाकरे गट) नगराध्यक्षपदी, शिवसेना (शिंदे गट) उपनगराध्यक्षपदी, भाजपकडे सभापतीपद, भाजपपुरस्कृत अपक्ष तसेच एम.आय.एम.चे सभापती, तर काँग्रेसही शिंदे गटासोबत सत्तेत सहभागी अशा परिस्थितीत मग विरोधात नेमकं कोण ? असा थेट सवाल नागरिक विचारत आहेत.
या पार्श्वभूमीवर नागरिकांच्या प्रतिक्रिया सोशल मीडियावर उमटत असून, सर्व सन्माननीय नगरसेवकांना एकत्रितपणे जबाबदारी स्वीकारण्याचे आवाहन करण्यात येत आहे. “आज सर्वच पक्ष सत्तेत आहेत. निवडणूक झाली, विरोध संपला. आता राजकीय मतभेद बाजूला ठेवून नगरीच्या विकासासाठी काम करा,अशी ठाम भूमिका नागरिक मांडत आहेत.राज्य व केंद्र सरकारमध्ये भाजप व शिंदे गटाची सत्ता असताना, त्या सत्तेचा लाभ ढाणकी शहरासाठी करून घ्यावा, नगरसेवकांनी एकत्रितपणे शासन दरबारी शहराच्या प्रश्नांचा पाठपुरावा करावा, अशी मागणी जोर धरत आहे.
मागील नगरपंचायत सभागृहाने सुचवलेली अनेक विकासकामे आज शहरभर सुरू असल्याचे वास्तव असताना, त्याच सातत्याने अमडापूर पाणीपुरवठा योजनेची मंजूर योजना तातडीने कार्यान्वित करावी, अशी अपेक्षा नागरिकांनी व्यक्त केली आहे. तसेच अप्पर तहसील कार्यालय, ३० खाटांचे ग्रामीण रुग्णालय यांसाठी मागील सभागृहाने केलेल्या पाठपुराव्याला गती देत प्रत्यक्ष मंजुरी मिळवून घ्यावी, अशी मागणीही पुढे येत आहे.
“उद्या तुम्ही असे म्हणू शकणार नाही की आम्ही सत्तेत नव्हतो,असा स्पष्ट इशारा नागरिकांच्या प्रतिक्रियांतून उमटत असून, या सर्व प्रश्नांवर नगरपंचायत प्रशासन नेमकी कोणती भूमिका घेणार, याकडे शहरवासीयांचे लक्ष लागले आहे.